Per un còp que la fac nos paga quicòm e qu'es plan !!!

E òc soi plan contenta perque ièr mercé al departament d'occitan faguèrem una pichòta sortida culturala (o pas ^^) pagada per la fac ! Un miracle perque de costuma la fac nos demanda totjorn de pagar quicòm : l'inscripcion, los libres que costan la pèl del cuol... Alara per un còp que paga quicòm ne cal profiechar !!! Donc anèrem al teatre La Vista per veire una pèça sonada "L'estanquet" !

Aquela pèça se descopa en cinc scenetas ont los personatges parlan mai que mai de cuol ^^ Coma o diguèt Claudi Alranq aquelas scenetas fan referéncia al vaudevila : es una comèdia fondada sus un comic de situacion (cf definicion mai precisa aquí ). Alara dins las istòrias i aviá totjorn un parelh e siá d'autres personatges siá un autre parelh. Dins aqueles parelhs i aviá totjorn una femna qu'alucava un tipe e francament i  a una actritz que o* fasiá fòrça fòrça plan ! ^^

La primièra sceneta que se sonava Sant Martin èra un pauc cona a mon vejaire, enfin l'istòria en ela-meteissa èra un pauc caluga mas lo biais de jogar dels personatges èra tarrible ! Los trobèri fòrça embugats per lors personatges. Cò que m'agradèt tanben èran las cançons perque balhavan un bon ambient :)

La segonda sceneta sonada Las palmas de Banador m'agradèt amb lo jòc de seduccion amagat e los jos-entenduts !

La tresena sceneta èra la melhora per ieu , se sonava Lo somnambul ! I aviá una femna anglesa que trabalhava dins un circ amb una autra femna, l'anglesa aviá un òme somnanbul que raubava de causas a las gents. Cò que me faguèt petar de rire es la tenguda del somnanbul qu'aviá un calçon zèbre, un t-shirt sexy, e una mena de bonet en cuèr sus la tèsta amb una coa blonda ^^ Era tarrible aquel tipe !

Enfin la darrièra sceneta se sonava Sopa de Morre èra l'istòria d'un parelh que se cridava dessus perque la femna voliá crompar un pijamà a la mòda e que l'òme èra pas d'acòrdi ! Alara lo vesin s'avisa que i a quicòm que truca en cò dels vesins e los va ajudar. Tròba coma idèia de far creire a la femna (qu'es partida crompar son pijamà ) que son òme es infidèl. Per far creire tot aquò lo vesin va cercar sa femna... Fin finala se tròba qu'es un pauc un escambi de parelhs mas cadun i tròba son compte !!

En fach çò que m'agradèt es lo costat vaudevila que ne *parlèt Claudi Alranc. Mas çò que m'agradèt fòrça es l'actritz que jogava de còps que i a l'alucaira, la caluga, lo filha un pauc cunhada...Tròbi qu'es melhor e mai agradiu de veire una pèça coma aquò ont tot lo mond ritz puslèu qu'una pèça seriosa coma las qu'anavi vèire al licèu ! E sequenon es pas per far de pub mas i a pas res que m'agradèt pas ! Plan segur i a de scenetas que m'agradèron mai que d'autres mas totas èran bonas :)

Donc vos conselhi d'i anar per passar un bon moment !!
Lo poton :)


(PS : Melània ai fach mon trabalh de gramatica mas ai tanben anticipat sus un futur devèr : dire çò que vos agradèt o non d'aquela pèça ^^)
*o : es un pronom neutre que se pòt emplegar en plaça de "lo" quora es COD
* "que ne" en plaça del "dont" francés

L'esquí

Adieu ! Bon ben coma de costuma vos vau contar ma vida ! La causa comencèt lo dijòus ont aprenguèri qu'aviái pas cors lo divendres, una bona causa coma aquò ai una vertadièra dimenjada  e subretot perque es la primièra annada ont ai un jorn de relambi dins la setmana !
Bon, aprenguèri aquò, e coma amb mon amic e de collègas aviam dich qu'una dimenjada nos caldriá anar a l'esquí, mandèri un messatge a mon amic per li dire qu'aquò se poiriá far.
Es coma aquò que tot comencèt, mon amic me respondèt : "- òc, ben, i anam aquesta dimenjada se vòls, que trabalhi pas deman (lo divendres) " Mas sabètz totes que ieu trabalhi lo dimenge a la fornariá, e aquò pausava problema per anar a l'esquí ... Subretot qu'èra pas possible de demandar un jorn perque aviái ja agut mon dimenge per Barcelona ! Donc èri segura que lo Big boss me donariá pas un jorn de mai !
Alara, comencèri de me pausar un molon de questions, un pauc coma : " de qué vau faire ?? Ai l'enveja de partir a l'esquí mas cossí far per la fornariá ?? " E coma me fasiái cagar en cors faguèri un pichòt per o contra per m'ajudar e per o mostrar a mas collègas per que me donen lor punt de vista ! Totas me diguèron d'i anar, que la fornariá i vau pas demorar bla bla bla .... Fin finala, tot lo monde èra del costat "per". Mas me diguèri : "Manon te cal parlar a ta maire de tot aquò, ela a totjorn la bona paraula per t'ajudar dins la causida! "
Alara, coma una flor, dintrèri a l'ostal :
- hi Mum (òc perque parli anglés a ma maire de còps que i a) ! Bon ai un problèma, cal que m'ajudes
- òc, t'escoti
- Bon, ben ai la possibilitat d'anar a l'esquí deman fins a dimenge, quasi a gratís perque avèm un amic que nos pòt logar, donc avèm pas que los repaises e lo forfait de pagar . Mas lo problèma es que trabalhi dimenge...

Es aquí que quicòm de completament baug se passèt ...

- Ben as pas que de dire que siás malauta dimenge e te'n vas a l'esquí !!!!

Amb aquela frasa, ma maire qu'es totjorn seriosa quora sagís de l'escòla o del trabalh, me faguèt tombar sul cuol ! Era tarrible que ma maire me trobèsse la desencusa per far petar la fornariá.

Alara, avèm pensat a un plan per fa creire a una malautiá !! Partiguèri a l'esquí e ma maire telefonèt lo dimenge de matin a la fornariá per dire que paure de ieu aviái una gastrò tarrible !!!!

Ma maire es la melhora !!!

Barcelona !

Adieu ! Eh vaquí soi tornada de Barcelona !! Donc coma promés vos vau contar ma vida a Barcelona !! ^^
Ja cal saber que partiguèri en bus, es a dire 5 oras de bus !! Mas bon coma soi jove e qu'es lo mens car per anar a Barcelona e ben me pausèri pas la question pendent 200 ans !! Donc foguèt longàs subretot perqué èri talament despacienta de veire la vila mas tanben ma collèga !! Lo ser de mon arribada anèrem manjar (non pas au barri ^^) mas dins un bar tapàs fòrça simpatic. La serada foguèt corteta perque una jornada de baug nos esperava l'endeman !!! Lo dissabte, la Sagrada Familia èra a gratis (sabi pas perqué) mas i aviá una coa que vos disi pas, las gents èran a esperar dins una coa mas sens saber ont menava aquela coa !!! Donc decidiguèrem de partir e de far la Sagrada un jorn ont es pas a gratis ! Puèi anèrem sus Passeig de Gracia, es un pauc coma los Champs Elysées de París, puèi sus las Ramblas ont i aviá un molon de gens e subretot de tipes que fan los automatas : n'i a que son tarribles e d'autres que fan paur ^^ Aprèp anèrem a la Barceloneta, es a dire a la plaja, èra enòrma perque i aviá de jòcs pels enfants e coma ne soi encara una, montèri al pus naut d'una piramida facha d'elastics (enfin bon sabi pas tròp se comprenètz, de tot biais metrai una foto quand las aurai ! )... Enfin ja se fasiá un pauc tard donc dintrèrem per dormir un pauc abans la  fèsta granda del ser ^^ E òc èra l'aniversari d'un amic chilenc, ont tot lo mond parlava espanhòl e que ieu èri pas capable de dire una frasa sens sortir un mot occitan en plaça d'un espanhòl ^^ Mas bon aprèp qualques gòts de mai èra perfièch !!
Donc coma faguèrem la fèsta tota la nuèch l'endeman partiguèrem far lo pargue Guell a 16h ! E es la sola causa qu'avèm facha dins la jornada, es per vos dire nòstre estat general ^^  Lo diluns ma collèga aviá un parcial lo matin donc partiguèri amb ela e visitèri sa fac en esperant ! E ben pòdi dire que sa fac es francament bèla a costat d'aquela poiridura de Pau Valèry ! E aprèp son parcial anèri amb ela a un cors de literatura, e ben vos pòdi dire tanben que se n'i a que vòlon partir en Erasmus anatz-i perque son aisits los corses francament : una ora per far doas linhas d'un text en francés ^^
Lo ser anèrem manjar dins un bar tapàs fòrça plan, ont tre que prenes una beguda te balhan una escudèla de tapàs gratis ! Tarrible non ?
Enfin, dimars anèri en cors amb ma collèga, cors de latin (causa que m'aviá pas mancada pendent las vacanças perlongadas) mas pas quin que siá cors de latin, un cors de latin en castilhan mesclat de catalan ! Vos disi pas, ai pas res de res comprés ^^ E malaürosament a la fin del cors èra l'ora de tornar en França... Prenguèri mon bus que aqueste còp lo trajècte me semblèt mens long sabi pas perqué...

Vaquí soi fòrça fòrça contenta d'aver vista ma collèga, d'aver visitar aquela vila polida polida de Barcelona ! Era tarrible !
La sola causa de con, perque cal totjorn quicòm de con, es que, coma soi blonda, doblidèri mon aparelh foto (?) donc ai pas res de vos mostrar ^^ Cal esperar que ma collèga me mandèsse los qualques fotos qu'avèm es a dire las del divendres e del dissabte perque dins la serada per l'aniversari del chilenc n'i a un que petèt l'aparelh foto ^^ Me sembla que soi plena d'astre ^^
Lo poton :)

Vacanças perlongadas :)

Coma aparentament un molon de gents soi en vacanças perlongadas mercé a ma capitada als exams :) Es una bona causa perque figuratz-vos que soi malauta, enfin, sabi pas, arresti pas de dormir e soi totjorn crebada donc es pas una marrida causa d'èsser encara un pauc en vacanças !! Subretot perque aviái previst ja abans los parcials de far una virada a Barcelona pendent aquelas vacanças perlongadas ! E òc, ai una amiga qu'es partida en Erasmus aquesta annada a Barcelona e m'a convidada a son ostal :) Soi plan contenta de i poder anar perque ai pas jamai visitat aquela vila, se parla totjorn de la Sagrada Familia, del Gaudi, enfin d'un molon de causas qu'ai totjorn ausit parlar mas pas jamai vist... Bon e plan segur a Barcelona i a las fèstas, e de segur ne'n vau profiechar :) E ben òc aguèri mon dimenge a la fornariá donc vau profiechar de ma sola dimenjada de l'annada !!! En mai d'aquò mon amiga es una granda festejaira, e es plan conegut que los Erasmus fan totjorn la fèsta donc pensi qu'anam pas arrestar de bolegar nòstres cuols ^^

Vos balhi rendètz-vos a mon retorn per vos dire se tot s'es passat coma o aviái previst :)

Lo poton

Austràlia

Veni de veire que vos ai pas jamai contada ma "virada" en Austràlia ! E òc filha plena d'astre que soi, poguèri anar en Australia !!! 

L'istòria comença un jorn de 2007, una filha australiana arriba dins ma classa de 1°L per apréner a parlar francés. Coma soi parlièra, capabla de charrar amb una paret, anèri veire aquela filha !! Comencèrem de charrar amb mon anglés de vaca espanhòla e son francés incomprensible, bon èra pas aisit mas capitèrem de se compréner : urosament que lo langatge de las mans es internacional ! :)

Fin finala venguèrem amigas, faguèrem de sortidas ensems, de fèstas, e en cors eriam totjorn de charrar perque òc après qualques meses capitèrem de charrar sens las mans ^^ Aprèp un an e mièg li calguèt tornar en Austràlia, mas me diguèt : " Manon, te cal venir en Austràlia veire tota ma familha e mon país " !!! Aquò tombèt pas dins l'aurelha d'una sorda ! Donc decidiguèri qu'après mon bac partiriái la veire ! Crompèri las bilhetas d'avion, e partiguèri a la fin d'agost ! Arribèri en Austràlia après 22 oras de vòl ( confla aquò ), èra la nuèch donc vegèri pas grand causa...

Arribèri dins son ostal, tota la familha me parlava, mas ieu compreniái pas res, mon amiga doblidava de tot me revirar ^^ L'endeman me desverelhèri e vegèri un molonàs de cangorós dins l'òrt ( en fach es pas tant un òrt de tant qu'es grand, es puslèu una prada ^^). Mon amiga m'aviá aprestat un dejunar tipic : pancakes a las fragas o a las pomas : tarrible ! En fach cada matin me fasiá una especialitat : un daquòs amb de chocolat que me soveni pas pus del nom, de bacon ... Enfin bon de causas a te far petar la tripa ^^

Ja qu'èri fòrça contenta d'èsser en Austràlia, mon amiga me faguèt una suspresa enòrma : me paguèt un viatge per Sydney !!!!!  Era tarrible ja d'èsser a costat de Melbourne mas anar a Sydney èra encara pus tarrible !
Anèrem 3 còps a Melbourne, visitèri l'aquarium, lo Skydesk es la torre la mai granda de Melbourne,

 anèrem a Max Brenner : es un magasin ont se pòt crompar de chocolat mas tanben ne beure : chocolat caud, bresca al chocolat tròp tròp bon !!!

A Sydney, faguèrem una passejada en batèu per veire Sydney de totes sos costats, vegèrem de dalfins :) visitèri The Opera House, e pogèri pas traversar l'Harbour Bridge perque costava tròp car ... Preferèri mai que mai Melbourne que Sydney perque a Sydney en defòra de l'Opera House e de l'Harbour Bridge i a pas grand causa de far ....

Mercé als parents de mon amiga mon periple s'arrestèt pas aicí. En efièch me menèron sus la còsta, per veire los Twelve Apostles. A la debuta deviam anar dins lo Queensland (al Nòrd d'Austràlia) mas coma èra luènh caliá i demorar al mens 3 jorns e coma i èri pas que per 2 setmanas fasiá pas pro de temps... Alara me menèron veire l'ocean, pas tan polit que dins lo Queensland mas polit quand mema :)

Gardi un sovenir subrebèl d'aquel viatge, èri fòrça plan aculhida per sa familha, èra un plaser de viure coma eles, de manjar lo famós "fish and chips", de descobrir un autre biais de viure, de veire cada matin un cangorós dins la prada ....

Mas aprèp tot aquò i aguèt un retorn fòrça fòrça dur a la realitat : tornèri lo 8 de Septembre jorn de la dintrada a la fac en 1èra annada. Lo primièr diluns i anèri pas perque èri a Paris en "transit" mas l'endeman quora deguèri me desrevelhar per anar a la fac sabiái pas pus ont èri !!! E òc l'espaci d'una segonda me pensavi en Austràlia dins ma cambra.... Foguèt fòrça dur de seguir lo primièr cor de lètras a la fac ^^
En mai d'aquò, aquel viatge me permet de rescontrar a la fac una filha que ara es una granda amiga : òc en charrar nos aviserèm que totas doas anèrem en Austràlia pendent l'estiu !!

Vesètz qu'anar en Australia es una causa que marca e que tanben permet de rescontrar d'amics aquí ^^
Ara espèri que mon amiga poirà venir en França, a mon ostal perque dempuèi que tornèri d'Austràlia li disi mas es complicat perque avèm pas las meteissas vacanças ... Enfin bon espèri qu'un jorn serà possible siá qu'ela venguèsse o ieu que i tornèsse ...



Bona annada plan granada plan acompanhada !

Lo ressopet de l'an nòu es totjorn un problema per ieu ! Ja sabi pas jamai ont lo far, i a de gents que te prepausan de causas mas n'en tròbi pas jamai una que me sembla geniala ! En fach lo ressopet de l'an nòu es una serada que tot lo mond crei que serà tarrible e es pas jamai lo cas !!! Esperam talament una serada granda que fin finala sèm decebuts perque es una serada coma las autras, e benlèu pièger... Bon aquesta annada èra difèrent perque faguèrem una serada mascarada, e ieu coma soi encara pichòta, me regali de me mascarar ^^ Amb mon amic, foguèrem mascarats en  grand Schtroumpf e Schtroumpfette, aviái una perruca rossèla que vos disi pas ma tèsta, e la cara tota blava !

 èra tarrible e simpatic perque tot lo mond joguèt lo jòc, bon d'unes mai que d'autres mas tot lo mond èra mascarat e ieu aimi plan aquò !!

Bon sequenon, vos desiri una bona annada, plan granada e subretot plan acompanhada ! Dirai que se siam pas pus que siaguèm pas mens... Desiri als estudiants de totes aver lors exams e d'èsser en vacanças fins al 24 de Genièr :) E espèri que passaretz una bona annada 2011, profiechatz-ne perque es la darrièra abans 2012 (fin del mond ^^) !
Lo poton

Nadal

Nadal : la granda fèsta de fin d'annada ! Coma a cada còp i a tota la familha que ven dinnar lo 25 : i a la tanta e l'oncle, los cosins, la mameta, la sòrre e tota sa familha, lo fraire, los parents.... Enfin tot aquò fa de mond mas bon es pas qu'un còp per an donc es pas grèu !
Aquesta annada èra un pauc different perque trabalhavi a la fornariá e donc poguèri pas ajudar per la cosina, per la disposicion de la taula (òc perque aquesta annada ma maire creguèt qu'èra pas Nadal mas un sopar gaireben perfièch : metèt un boà de plumas rojas al mitan de la taula amb de palhetas, enfin bon vos disi pas, la fotò parlarà d'ela-meteissa ^^

Sequenon, pendent lo repais bascalèrem amb mos cosins perque coma fasiá un bon moment que nos èram pas vistes aviam de causas de se dire :) Puèi aprèp qualques botelhas de roge ( òc avèm una botelha de vint ans d'atge que mos parents crompèron l'annada de ma naissença ), partiguèri quèrre una perruca rossèla  que vèni de crompar per l'an nòu ( que me cal desguisar e ai besonh d'una perruca rossèla per far mon personatge mas vos disi pas lo qual perque pensi qu'aquò farà l'objècte d'un autre article ^^) bon e amb aquela perruca avèm plan bascalat ! Mon fraire la metèt e semblava al tipe que fa Samantha sus France 2, ma maire fasiá la "bimbo"

e ma grand se metèt a cantar "il venait d'avoir 18 ans" de Dalida ^^

Tarrible !!!!
Enfin bon, fin finala pòdi dire que Nadal es una fèsta qu'aimi perque permet de veire tota la familha e de bascalar un pauc totes ensems :)

A lèu !